ڈکیتی مزاحمت پر ڈاکوؤں نے سیکیورٹی گارڈ کو گولی مار دی

ڈاکو گارڈ کو قتل کرنے کے بعد دکان میں لوٹ مار کر کے نقدی اور موبائل فون لے گئے۔

ملتان (وائس نیوز) ملتان میں میڈیکل سٹور پر سکیورٹی گارڈ کی ڈیوٹی دینے والے شخص کو جمعرات کی صبح ڈاکوؤں کی جوابی فائرنگ سے قتل کر دیا گیا۔

واقعہ تھانہ صدر کی حدود میں ایم ڈی اے چوک کے قریب اس وقت پیش آیا جب چہروں پر نقاب پوش تین ڈاکو ڈکیتی کی نیت سے میڈیکل سٹور میں داخل ہوئے۔ صورتحال کی سنگینی کو بھانپتے ہی سیکیورٹی گارڈ نے ڈاکوؤں کو روکنے کی کوشش کی تو ڈاکوؤں نے اسے گولی مار دی۔

ڈاکو گارڈ کو قتل کرنے کے بعد دکان میں لوٹ مار کر کے نقدی اور موبائل فون لے گئے۔ تاجر تنظیموں نے اس معاملے پر تشویش کا اظہار کیا ہے اور مطالبہ کیا ہے کہ ان کے کاروبار کو چلانے کے لیے محفوظ ماحول فراہم کیا جائے۔

پولیس نے واقعے کے بعد جائے وقوعہ پر پہنچ کر شواہد اکٹھے کرنا شروع کردیے۔ پولیس حکام کا کہنا ہے کہ محکمہ مجرموں کا سراغ لگانے اور انہیں سلاخوں کے پیچھے پہنچانے کے لیے اپنے تمام وسائل بروئے کار لائے گا۔