عطا تارڑ نے وکیل کے قتل میں پی ٹی آئی کے ملوث ہونے کا الزام لگا دیا

انہوں نے کہا کہ بلوچستان حکومت اور قانون نافذ کرنے والے اداروں کو معاملے کی شفاف تحقیقات کرنے کی ہدایت کر دی گئی ہے۔

اسلام آباد: وزیراعظم کے معاون خصوصی عطا اللہ تارڑ نے کوئٹہ میں سپریم کورٹ کے وکیل عبدالرزاق شر کے قتل کا ذمہ دار پاکستان تحریک انصاف کے چیئرمین عمران خان پر عائد کردیا ہے۔

عطا تارڑ نے دعویٰ کیا کہ عبدالرزاق کو خاص طور پر عمران خان کے خلاف غداری کے مقدمے میں ملوث ہونے کی وجہ سے نشانہ بنایا گیا۔

مزید برآں تارڑ نے کہا کہ عمران خان کو قتل کیس میں بطور ملزم نامزد کیا جائے گا۔

انہوں نے کہا کہ بلوچستان حکومت اور قانون نافذ کرنے والے اداروں کو معاملے کی شفاف تحقیقات کرنے کی ہدایت کی گئی ہے۔

انہوں نے کہا، ’’آپ اس کیس میں حکم امتناعی حاصل کرنے کے قابل نہیں ہوں گے اور نہ ہی آپ کو اس کیس میں ضمانت مل سکے گی۔‘‘

عطا تارڑ نے کہا کہ یہ عمران خان کے خلاف مقدمات کی پیروی کرنے والے تمام وکلاء کے لیے ایک پیغام ہے۔

انہوں نے دعویٰ کیا کہ پی ٹی آئی نے 9 مئی کے واقعات میں ایک دہشت گرد جماعت کی طرح برتاؤ کیا تھا اور اب اس نے اپنے مقصد کے حصول کے لیے جانیں قربان کرنے کا فیصلہ کیا ہے۔ انہوں نے مزید کہا کہ پی ٹی آئی 2014 سے دہشت گردی کے راستے پر چل رہی ہے۔