امریکہ خوشحال اور مستحکم پاکستان دیکھنا چاہتا ہے، محکمہ خارجہ

ویدانت پٹیل نے کہا کہ ایک خوشحال اور مستحکم پاکستان امریکہ اور پاکستان کے تعلقات کے مفاد میں ہے۔

واشنگٹن: امریکی محکمہ خارجہ کے پرنسپل نائب ترجمان ویدانت پٹیل نے کہا ہے کہ امریکہ خوشحال اور مستحکم پاکستان دیکھنا چاہتا ہے۔

واشنگٹن ڈی سی میں صحافیوں کو بریفنگ دیتے ہوئے انہوں نے کہا کہ ایک خوشحال اور مستحکم پاکستان امریکہ اور پاکستان کے تعلقات کے مفاد میں ہے۔ ہم پاکستان کے ساتھ براہ راست کئی معاملات پر مصروف ہیں لیکن ہر سفارتی رابطے پر بیان نہیں دیا جا سکتا۔

ایک سوال کا جواب دیتے ہوئے، پٹیل نے کہا: "ہم اپنے پاکستانی شراکت داروں کے ساتھ ان مسائل پر براہ راست بات کرتے ہیں جو امریکہ کے لیے اہمیت کے حامل ہیں اور وسیع تر علاقائی سلامتی اور استحکام کے لیے اہمیت کے حامل ہیں۔”

گزشتہ 20 سال سے امریکی جیل میں قید ڈاکٹر عافیہ صدیقی کے حوالے سے پوچھے گئے سوال کے جواب میں امریکی اہلکار نے کہا کہ اس کیس پر محکمہ خارجہ کے پاس بولنے کے لیے کچھ نہیں ہے۔ انہوں نے مزید کہا، "میں متعلقہ قانون نافذ کرنے والے حکام کو اس سوال کا حوالہ دوں گا۔”