جسٹس اقبال حمید الرحمان نے وفاقی شرعی عدالت کے چیف جسٹس کے عہدے کا حلف اٹھا لیا

چیف جسٹس بندیال نے سپریم کورٹ میں جسٹس رحمان سے حلف لیا۔

جسٹس اقبال حمید الرحمان نے وفاقی شرعی عدالت کے چیف جسٹس کے عہدے کا حلف اٹھا لیا۔

حلف برداری کی تقریب جمعرات کی صبح منعقد ہوئی۔ چیف جسٹس آف پاکستان عمر عطا بندیال نے جسٹس رحمان سے حلف لیا۔

تقریب میں سپریم کورٹ کے ججز اور اٹارنی جنرل پاکستان نے شرکت کی۔

اس موقع پر جسٹس مظاہر علی نقوی، جسٹس جمال خان مندوخیل، جسٹس محمد علی مظہر، جسٹس شاہد وحید اور جسٹس حسن اظہر رضوی بھی موجود تھے۔

جسٹس اقبال حمید الرحمان کون ہیں؟

جسٹس اقبال حمید الرحمان 1956 میں ڈھاکہ میں پیدا ہوئے، انہوں نے 1980 میں پنجاب یونیورسٹی، لاء کالج، لاہور سے ایل ایل بی کی پروفیشنل ڈگری حاصل کی۔ 1983 میں ہائی کورٹ اور 1997 میں سپریم کورٹ میں بطور وکیل داخلہ لیا۔

1998 میں لاہور ہائی کورٹ بار ایسوسی ایشن کے سیکرٹری منتخب ہوئے۔ 2006 میں انہیں لاہور ہائی کورٹ کے ایڈیشنل جج کے طور پر ترقی دی گئی اور 27 اکتوبر 2007 کو مستقل جج کے عہدے پر فائز ہوئے۔

2007 میں عبوری آئینی حکم نامے کے نفاذ کے بعد انہیں پی سی او کے تحت حلف اٹھانے کو کہا گیا لیکن انہوں نے انکار کر دیا۔

18ویں ترمیم کی منظوری اور اسلام آباد ہائی کورٹ کے قیام کے بعد، وہ 3 جنوری 2011 کو اس کے پہلے آئینی چیف جسٹس اور 25 فروری 2013 کو سپریم کورٹ کے جج کے عہدے پر فائز ہوئے۔

جسٹس رحمان کے والد جسٹس حمود الرحمن تھے، جو 1968 میں پاکستان کے چیف جسٹس تھے اور حمود الرحمن کمیشن رپورٹ کے مصنف تھے جس نے 1971 میں پاکستان کے ٹوٹنے کے حالات کے بارے میں انکوائری کی تھی۔