معاشی بحران: پاک سوزوکی نے 10 جون سے موٹر سائیکل پلانٹ بند کرنے کا اعلان کردیا

یہ اعلان پاکستان اسٹاک ایکسچینج کو ایک نوٹس میں شیئر کیا گیا ہے۔

کراچی: ملک کی معاشی صورتحال مزید خراب ہونے پر پاک سوزوکی موٹر کمپنی نے منگل کو ایک بار پھر اعلان کیا ہے کہ وہ اپنا موٹر سائیکل پروڈکشن پلانٹ 10 جون تک بند کر دے گی۔

یہ اعلان پاکستان اسٹاک ایکسچینج کو ایک نوٹس میں شیئر کیا گیا۔ اس میں کہا گیا ہے کہ یہ فیصلہ جاری حکومتی درآمدی پابندیوں کی وجہ سے کیا گیا ہے جس نے آٹو سیکٹر کو متاثر کیا ہے، جس کی وجہ سے انوینٹری کی کمی ہے۔

نوٹس کے مطابق، انوینٹری کی سطح کی کمی کی وجہ سے کمپنی کی انتظامیہ نے 23 مئی 2023 سے 10 جون 2023 تک موٹرسائیکل پلانٹ بند کرنے کا فیصلہ کیا ہے۔ تاہم، آٹوموبائل پلانٹ فعال رہے گا۔

معروف آٹوموبائل کمپنی نے اس سے قبل خام مال کی کمی کی وجہ سے اپنا آٹوموبائل اور موٹرسائیکل پلانٹ 9 مئی تک بند کر دیا تھا۔ کمپنی نے 7 اپریل سے 28 اپریل تک آٹوموبائل پلانٹ بھی بند کر دیا تھا۔