پی ٹی آئی کے سابق ایم این اے عامر کیانی نے پارٹی چھوڑنے کا اعلان کردیا

کہتے ہیں فوجی خاندان سے تعلق رکھتے ہیں، جی ایچ کیو، کور کمانڈر ہاؤس پر حملے پر افسوس ہے۔

اسلام آباد: پاکستان تحریک انصاف کو ایک اور جھٹکا لگا ہے، سابق ایم این اے عامر کیانی نے مبینہ طور پر پارٹی سے علیحدگی کا فیصلہ کر لیا ہے۔

کیانی نے نہ صرف پی ٹی آئی چھوڑنے کا فیصلہ کیا بلکہ اپنا سیاسی کیرئیر ختم کرنے کا اعلان بھی کیا۔

نجی ٹی وی سے خصوصی گفتگو کرتے ہوئے ، پی ٹی آئی کے وفادار اور سابق ایم این اے نے کہا کہ انہوں نے یہ فیصلہ راولپنڈی اور لاہور میں مرکزی فوجی تنصیبات پر حملوں کے تناظر میں کیا۔

ان کا کہنا ہے کہ ان کا تعلق ایک فوجی خاندان سے ہے، اور راولپنڈی میں جی ایچ کیو اور لاہور میں کور کمانڈر ہاؤس پر حملے پر گہرے افسوس کا اظہار کیا۔

"اب میں صرف ایک جھنڈا رکھوں گا۔ کیانی نے نجی ٹی وی کو بتایا کہ اب ہم صرف سبز ہلالی پرچم کے ساتھ رہیں گے ۔

انہوں نے یہ بھی دعویٰ کیا کہ وہ پی ڈی ایم سمیت کسی بھی سیاسی جماعت میں شامل نہیں ہوں گے۔

اس سے قبل، منگل کے روز، پارٹی کو ایک بڑا دھچکا لگا جب ایم این اے محمود مولوی نے 9 مئی کو سابق وزیر اعظم عمران خان کی گرفتاری اور لاہور میں کور کمانڈر ہاؤس کو جلانے کی وجہ سے پھیلی بدامنی کے بعد پارٹی چھوڑ دی تھی۔