اعظم سواتی کی ضمانت منسوخی کے لیے اسلام آباد ہائیکورٹ میں درخواست دائر

اسلام آباد ہائی کورٹ کے چیف جسٹس عامر فاروق آج کیس کی سماعت کریں گے۔

اسلام آباد: وفاقی تحقیقاتی ادارے (ایف آئی اے) کے سائبر کرائم ونگ نے متنازع ٹویٹس کیس میں پی ٹی آئی رہنما اعظم سواتی کی ضمانت منسوخی کے لیے اسلام آباد ہائی کورٹ میں درخواست دائر کردی ہے۔

ذرائع کا کہنا ہے کہ اعظم سواتی کی جانب سے راولپنڈی میں ایک تقریب کے دوران سیکیورٹی اداروں کے خلاف متنازعہ ریمارکس کے بعد ایف آئی اے نے اسلام آباد ہائی کورٹ سے رجوع کیا ہے۔

انہوں نے مزید کہا کہ اسلام آباد ہائی کورٹ کے چیف جسٹس عامر فاروق (آج) منگل کو کیس کی سماعت کریں گے۔

مزید کہا گیا کہ درخواست کے ساتھ اعظم سواتی کی متنازع تقریر کا ٹرانسکرپٹ بھی شامل کیا گیا ہے۔

اس سے قبل ایف آئی اے سائبر کرائم ونگ نے پی ٹی آئی رہنما کے خلاف مقدمہ درج کیا تھا۔ انہیں اسلام آباد ہائی کورٹ نے ضمانت پر رہا کیا تھا۔

عدالت نے ضمانت منظور کرتے ہوئے کہا تھا کہ اگراعظم سواتی نے جرم دہرایا تو ضمانت منسوخی کی درخواست دائر کی جا سکتی ہے۔

گزشتہ سال نومبر میں پیمرا نے اعظم سواتی کی تقاریر، نیوز کانفرنسز اور ان کی میڈیا کوریج بشمول ٹاک شوز، بیانات یا ٹکرز میں بطور مہمان تمام سیٹلائٹ ٹی وی چینلز کو نشر یا دوبارہ نشر کرنے پر پابندی عائد کر دی تھی۔