وزیر ِ اعظم شہباز شریف نے زلزلہ متاثرین کے لیے ریلیف فنڈ قائم کرنے کا اعلان کر دیا

وزیر ِ اعظم شہباز شریف نے وفاقی کابینہ کے اجلاس میں ترکیہ اور شام میں زلزلے سے ہزاروں ہلاکتوں پر افسوس کا اظہار کرتے ہوئے متاثرین کی امداد کے لیے ریلیف فنڈ قائم کرنے کا اعلان کیا ہے

وزیر ِ اعظم شہباز شریف کی زیر ِ صدارت منعقد ہونے والے وفاقی کابینہ کے اجلاس کے اعلامیے میں زلزلہ زدگان کے لیے ریلیف فنڈ قائم کیا گیا ہے اور عوام سے اس میں د ل کھول کر امداد کرنے کی اپیل بھی کی گئی ہے۔
اعلامیے کے مطابق زلزلہ متاثرین کے لیے گریڈ 18 سے22 کے افسران ایک دن کی تنخواہ عطیہ کریں گے۔ریلیف فنڈ برائے متاثرین زلزلہ ترکیہ کے لیے ’وزیر ِ اعظم ریلیف فنڈ جی – 12166‘ اکاؤنٹ قائم کیا گیا ہے۔جس کا نوٹیفکیشن آفس آف دی کنٹرولر جنرل آف اکاؤنٹس نے جاری کر دیا ہے۔
وزیر ِ اعظم شہباز شریف نے اجلاس سے خطاب کر تے ہوئے کہا کہ پاکستان اور ترکی یک جان دو قالب ہیں،2022 کے تاریخی سیلاب میں ترکی پاکستانی بھائیوں کی مدد میں پیش پیش رہا ہے۔اپنے ترک بہن بھائیوں کو مصیبت کی اس گھڑی میں بالکل اکیلا نہیں چھوڑیں گے۔میں بذات ِ خود کل زلزلہ زدہ علاقوں کے دورے کے لیے روانہ ہو رہا ہوں۔مجھ سمیت پوری پاکستا نی قوم ترکیہ اور شام کی عوام کے شانہ بشانہ کھڑی ہے۔
انہوں نے کہا کہ فوری امدادی سرگرمیوں کے لیے ریسکیو ٹیمیں ترکیہ روانہ کر دی گئی ہیں۔زلزلہ زدگان بہن بھائیوں کی پاکستان ہر ممکن مدد کرے گا۔