پشاور دھماکے پر وزیر ِ اعظم کی آئی جی خیبر پختونخوا سے باز پرس

پشاور: وزیر ِ اعظم شہباز شریف نے پولیس لائنزکی مسجد میں خود کش دھماکے پر آئی جی خیبر پختونخوا سے جواب طلب کر لیا

گزشتہ روز پولیس لائنز کی مسجد میں ظہر کی نماز کے دوران خود کش دھماکہ ہوا جس کے نتیجے میں شہید ہونے والوں کی تعداد83 ہو گئی ہے جب کہ 150 سے زائد افراد زخمی ہیں۔
دھماکے کے بعد وزیر ِ اعظم شہباز شریف اور آرمی چیف جنرل عاصم منیر نے پشاور لیڈی ریڈنگ ہسپتال کا دورہ کیا اور زخمیوں کی عیادت کی۔وزیر ِ اعظم شہباز شریف نے مسجد میں دھماکے پر شدید برہمی کا اظہار کرتے ہوئے آئی جی خیبر پختونخوا سے جواب طلب کر لیا۔وزیر ِ اعظم نے آئی جی معظم جاہ انصاری سے استفسار کیا کہ خود کش حملہ آور کیسے پولیس لائنز میں داخل ہو گیا؟ پولیس لائنز میں داخلے کا ایک ہی گیٹ ہے،حملہ آور کہاں سے آیا؟
آئی جی معظم جاہ انصاری نے دلائل دیتے ہوئے کہا کہ تحقیقات کر رہے ہیں کہ حملہ آور کیسے داخل ہوا۔پولیس لائنز میں فیملی کوارٹرز بھی ہیں،کیا پتہ حملہ آور کہاں سے آیا اور کیسے داخل ہو؟ ہو سکتا ہے حملہ آور پہلے ہی سے اندر رہ رہا ہو۔