عمران خان پر قاتلانہ حملے کی فارنزک رپورٹ سامنے آگئی

لاہور: سابق وزیر ِ اعظم عمران خان پروزیر آباد میں ہونے والے قاتلانہ حملے کی فارنزک رپورٹ سامنے آگئی

سابق وزیر ِ اعظم عمران خان پروزیر آباد میں ہونے والے قاتلانہ حملے کی فارنزک رپورٹ4 صفحات پر مشتمل ہے۔رپورٹ کے مطابق عمران خان پر حملے کی جگہ سے 31 خول برآمد ہوئے ہیں،3 گولیوں کے ٹکڑے کنٹینر پر لگے جو اسپیکر سے ملے اور 3 گولیوں کے ٹکڑے کنٹینر کی گرل سے ملے۔14 گولیوں کے خول سڑک سے ملے جب کہ گولی کا 1 خول دوکان کے اندر زمین سے ملا۔
رپورٹ میں انکشاف کیا گیا ہے کہ عمران خان پر حملہ کرنے والے ملزم نوید کے گھر کے قریب بھی ایک گراؤنڈ سے 10 خول برآمد کیے گئے۔عمران خان کو 1 مکمل گولی لگی جب کہ 2 گولیاں کسی چیز سے ٹکرانے کے بعد لگیں۔عمران خان کے جسم میں ایک دھات کا ٹکڑا بھی پیوست ہوا جو نکال لیا گیا،4 گولیاں ایسی تھیں جو ملزم نوید کے پستول سے چلیں تھیں۔ملزم سے ملنے والے ایک پستول کا بھی فارنزک ہوا جس سے ایک فائر ٹیسٹ کیا گیا۔موقع سے ملنے والی 2 گولیاں ایسی ہیں جو کلاشنکوف کی ہیں۔
رپورٹ کے مطابق حملے میں زخمی احمد چھٹہ اور عمران یوسف کو لگنے والی گولیوں کا بھی فارنزک کیا گیا۔